కేరళలో విలయం.. ఎందుకిలా?

దేవుని సొంతభూమిగా ఖ్యాతిచెందిన కేరళ భారీ వర్షాలతో ఉక్కిరిబిక్కిరవుతోంది. రాష్ట్రంలోని మొత్తం 14 జిల్లాలు వరదలతో అతలాకుతలమవుతున్నాయి. రాష్ట్రంలోని 44 నదులు పొంగిప్రవహిస్తుండటంతో అనేక డ్యాముల ప్రాజెక్టులను ఎత్తి నీటిని కిందకు వదులుతున్నారు. ఉత్తరాన కాసర్‌గోడ్‌ నుంచి దక్షిణం చివర ఉన్న తిరువనంతపురం వరకు అన్ని జిల్లాలపై వరుణుడు కుంభవృష్టి కురిపిస్తున్నాడు. నైరుతి రుతుపవనాల ప్రభావంతో రాష్ట్రంలో జలవిలయం తాండవిస్తోంది. 1924 అనంతరం ఇంత భారీగా వర్షపాతం రావడం ఇదే కావడంతో ప్రజలు బెంబేలెత్తిపోతున్నారు.

99 వరదలు:

1924లో కేరళలో వరదలు బీభత్సం సృష్టించాయి. అప్పట్లో రాష్ట్రం ట్రావెన్కూర్‌, మలబార్‌ ప్రాంతాలుగా ఉండేది. ఆ ఏడాది వర్షాకాలంలో మొత్తం 3348 మి.మీ. వర్షం కురిసింది. అనంతరం ఇన్నేళ్లకు ఆ స్థాయిలో వర్షాలు కురుస్తున్నాయి. ఇప్పటి వరకు 2 వేల మి.మీ. పై వర్షపాతం నమోదుకావడం గమనార్హం. మళయాళీల కాలెండర్‌ ప్రకారం 1924ను 1099గా పరిగణిస్తారు. అందుకనే 99 వరదలు అని పేర్కొంటారు.తాజా వర్షాలతో కొచ్చిన్‌ విమానాశ్రయాన్ని కూడా మూసివేయడం తీవ్రతను తెలుపుతోంది.

ఎందుకిలా?

* రాష్ట్రంలో గత రెండు దశాబ్దాలుగా పర్యావరణ విధ్వంసం కొనసాగింది. వాస్తవానికి పశ్చిమకనుమలు పర్యావరణ పరంగా అతి సున్నితమైన ప్రాంతాలు. వీటిని పరిరక్షించాలని ప్రముఖ పర్యావరణవేత్త మాధవ్‌గాడ్గిల్‌ తన నివేదికలో సూచించారు. అయితే అప్పట్లో కేరళలో అధికారంలో ఉన్న యూడీఎఫ్‌ ప్రభుత్వం ఈ నివేదికను పూర్తిగా తిరస్కరించింది. కొండపైన ప్రాంతాల్లో విచ్చలవిడిగా నిర్మాణాలు, చెట్ల నరికివేతతో పైనుంచి నీటి ప్రవాహవేగం రెట్టింపయింది. దీంతో అనేక ప్రాంతాల్లో కొండచరియలు విరిగిపడటంతో అపారనష్టం సంభవించింది.

* పర్యాటకం: పశ్చిమకనుమల్లో పర్యాటకం బాగా పెరిగింది. ప్రభుత్వ-ప్రైవేటు భాగస్వామ్యంతో సున్నిత ప్రాంతాల్లో కాంక్రీటు నిర్మాణాలును నిర్మించారు. దీంతో నీటిని నిల్వచేసుకునే సామర్థ్యాన్ని కొండ ప్రాంతాలు కోల్పోయినాయి. కొండ ప్రాంతాలపై పెరిగిన జనాభాకు అనుగుణంగా అటవీప్రాంతాలను నిర్మూలించి గృహాలు నిర్మించారు. ఇది కూడా ఈ విపత్తుకు మరో కారణమైంది.

*విచ్చలవిడిగా ఇసుక తవ్వకాలు.. రాష్ట్రంలో గత పదేళ్ల నుంచి ఇసుకను విచ్చలవిడిగా తవ్వి తరలించారు. ఇసుక తవ్వకాలతోనే కొన్ని వందల కోట్లను అక్రమంగా సంపాదించారు. నదీగర్భాన్ని తవ్వివేయడంతో వరదనీటిని నిల్వచేసుకునే సహజత్వాన్ని నదీప్రాంతాలు కోల్పోయాయి. దీంతో ప్రవాహవేగం పెరిగి జనావాసాలపై నదీజలాలు ఎగిసిపడ్డాయి.

ఇవే కాకుండా అంతర్జాతీయంగా వాతావరణంలో పెరుగుతున్న కర్బన ఉద్గరాలు, వాతావరణ మార్పులు.. తదితర అంశాలు ఇలాంటి ప్రకృతి విపత్తులకు దోహదం చేస్తున్నాయి.

Related posts

Leave a Comment